Сход у Верхнядзвінску наведала чыноўніца райвыканкама

У падрыхтоўчым да Беларускага Еўрапейскага Форуму мерапрыемстве прынялі ўдзел актывісты амаль усіх прадстаўленых у рэгіёне палітычных партый.

У офісе ГА "Рубон" сабраліся каля трыццаці чалавек. У якасці гасцей на сходзе прысутнічалі намеснік старшыні Руху "За Свабоду" Вікатр Карнеенка, актывіст Руху "За Свабоду" Алесь Жучкоў, сустаршыня Партыі БХД Павал Севярынец, каардынатар Руху "За Свабоду" па Віцебшчыне Хрыстафор Жэляпаў. Упершыню мерапрыемства такога кшталту наведала прадстаўніца ідэалагічнага аддзела райвыканкама.

Віктар Карнеенка распавёў пра палітычную сітуацыю ў Беларусі, асаблівасці і адрозненні палітычных структур, які пазіцыянуюць сябе як дэмакратычныя, а таксама пра падрыхтоўку да Беларускага Еўрапейскага Форуму. 

Павал Севярынец у сваім выступе акцэнтаваў увагу на маральных каштоўнасцях дэмакратычнага руху.

Паводле www.euravitebsk.org акрамя пытанняў Еўрапейскага форума і Еўраінтэграцыі ўдзельнікі сходу Верхнядзвінска цікавіліся вынікамі грамадскіх слуханняў будаўніцтва атамнай электрастанцыі, якія праходзілі ў гэты дзень ў Астраўцы. У Верхядзвінску жыве вялікая колькасьць перасяленцаў з Чарнобыльскай зоны і зразумела, што іх непакоіць перспектыва зноўку апынуцца ў зоне радыяцыйнай небяспецы.

Таксама актыўна дыскутавалася тэма перапісу насельніцтва. Людзі цікавіліся пытаннем аб роднай мове, бо як вядома ў перапісных анкетах будзе прысутная незразумелая фармулёўка , "Ваша родная мова (мова, засвоеная першай у раньнім дзяцінстве)", якая, на думку прысутных, свядома правакуе Беларусаў называць родную мову – мову іншай краіны.

У якасці дэлегатаў на Форум абрана 12 чалавек (двое з Міёр і дзесяць з Верхнядзвінску), у тым ліку вядомая ў рэгіёне грамадская актывістка Валянціна Кудлацкая і  дэпутатка сельсавета Наталля Васіленка.