У Белаазёрску вылучылі 10 дэлегатаў на Форум (фота)

Рэгіянальны сход па вылучэнню дэлегатаў на Беларускі Еўрапейскі Форум адбыўся 4-га верасня.

У офісе мясцовай дэмакратычнай супольнасці сабраліся актывісты з Белаазёрску, Бярозы, Драгічына, Янава і Малеча.

У сходзе прынялі ўдзел прадстаўнікі шэрагу грамадскіх і палітычных арганізацый сярод якіх Рух "За Свабоду", Партыя БНФ, "Малады Фронт" і іншыя.

Адкрыў сход Старшыня Брэсцкага абласнога аргкамітэта Зміцер Траццяк. Старшынём і сакратаркай сходу былі абраны Яўген Паркурат і Кацярына Паўлюковіч.

Ганаровыя госці мерапрыемства, прадстаўнік нацыянальнага аргкамітэта Юрась Губарэвіч а таксама эксперты Беларускага інстытуту стратэгічных даследаванняў Віталь Сіліцкі і Дзяніс Мельянцоў, выступілі перад прысутнымі

Юрась Губарэвіч у сваім выступе засяродзіўся на бягучай палітычнай сітуацыі ў краіне, адносінах у апазіцыйным асяродку. Ён таксама распавёў аб ідэі правядзення Беларускага еўрапейскага форума.

Дзяніс Мельянцоў патлумачыў практычныя плюсы ад удзелу Беларусі ў праграме Усходняга Партнёрства для беларускага грамадства, распавёў слухачам пра чатыры базавых платформы гэтай міжнароднай праграмы. Ягоны выступ больш тычыўся эканамічных аспектаў удзелу Беларусі ва Ўсходнім Партнёрстве.

Згодна за працэдурай на Беларускі Еўрапейскі Форум было абрана 10 дэлегатаў, якія будуць прадстаўляць Бярозаўскі, Драгічынскі і Янаўскі раёны.

Пасля гэтага ўдзельнікі сходу атрымалі магчымасць задаць свае пытанні гасцям з Мінску.

Прысутных цікавіла перспектыва ўзаемадзеяння Беларусі з Еўразвязам, будучыя прэзідэнцкія выбары, эканамічная сітуацыя ў Беларусі.

Нягледзячы на вечаровы час, сход доўжыўся амаль дзве гадзіны.